Azərbaycanın Sumqayıt şəhərində ağır yol qəzası baş verib. Bu barədə Sumqayıt şəhər Polis İdarəsindən verilən məlumata görə, hadisə ötən gecə Bakı-Quba yolunun 33-cü kilometrliyində, Sumqayıtın Hacı Zeynalabdin Tağıyev qəsəbəsi ərazisində qeydə alınıb.

Sumqayıt sakini, Ağaəli Dadaşovun idarə etdiyi “Hyundai” markalı, 50 BU 051 dövlət nömrə nişanlı sərnişin avtobusu yolun əks istiqaməti ilə hərəkət edən, Vüqar Tapdıqovun idarə etdiyi “VAZ-2107” markalı minik maşını ilə toqquşub. Qəza nəticəsində, “VAZ-2107”nin sürücü Vüqar Tapdıqov aldığı xəsarətdən hadisə yerindəcə keçinib. Sərnişin avtobusunun sürücüsü və daha 9 nəfər sərnişin xəsarət alıblar. Sərnişinlərdən Elvira Quliyeva, İsmayıl İmamzadə, Əli Muradov və Hüseynağa Hüseynovun xəsarətləri ağır olduğundan onlar Sumqayıt şəhər Təcilli Tibbi Yardım Xəstəxanasına yerləşdiriliblər.

Faktla bağlı araşdırma aparılır.