Yaponlar ölkədə baş verən dəhşətli zəlzələ və şüalanmadan sonra nümayiş etdirdikləri şücaət və vətənpərvərlikləri ilə bütün dünyanı heyrətləndirirlər. “Fox News” telekanalı Yaponiyanın "Fukusima-50" Atom Elektrik Stansiyasının əməkdaşlarından birinin anasına istinadən ürəkyandırıcı həqiqətləri açıqlayıb. Burada söhbət “Fukusima-50” AES-nin 50 nəfərdən ibarət cəsur və fədakar əməkdaşlarından gedir. Onlar öz həyatlarını qurban verərək, yenidən baş verə biləcək faciənin qarşısını almaq üçün bütün səylərini səfər edirlər.

Qeyd edək ki, “Fukusima” Atom Elektrik Stansiyasının komandası bir insan üçün müəyyən edilmiş miqdardan da artıq şüalanmaya məruz qalıb. Həmin stansiyanın əməkdaşlarından birinin anası “Fox News”a danışarkən deyib ki, orada çalışanlar özləri də həddən artıq yüksək miqdarda şüalanmaya məruz qaldıqlarından böyük ehtimalla şüalanma xəstəliyindən də öləcəklərini etiraf edirlər.

32 yaşlı ana “Fox News”a müsahibəsində bildirib ki, oğlu həmkarları ilə birgə bu məsələni müzakirə edib və onlar yekun qərar veriblər: “Onlar öz xalqlarını xilas etmək naminə ölümə hazırdırlar. O mənə dedi ki, yaxın vaxtlarda və ya müəyyən müddətdən sonra şüalanma, ya da xərçəng xəstəliyindən ölə biləcəkləri ilə artıq barışıblar”.

Ağlaya-ağlaya danışan qadın kimliyinin açıqlanmamasını xahiş edib. Belə ki, AES rəhbərliyi əhali arasında vahimə yaranmasın deyə stansiya əməkdaşlarına mətbuat və yaxınları ilə mümkün qədər az ünsiyyət saxmaq barədə tapşırıq verib. Qadın öz oğlunun hazırda şüalanma xəstəliyindən əziyyət çəkib-çəkmədiyi haqda dəqiq məlumata malik olmadığını deyərək əlavə edib ki, oğlu ilə danışarkən o öləcəklərinin qaçılmaz olduğunu və hətta bəzilərinin yaxın bir neçə həftə və ya ay ərzində həyatlarını itirəcəklərini deyib: ”Onlar yaxşı bilirlər ki, ölümcül şüalanma miqdarına məruz qalıblar”.

Öz növbəsində “Tokio Electric Pauer Company” AES operator şirkəti bildirib ki, qəhrəman əməkdaşlar briqadası mütəmadi olaraq tibbi müayinə olunurlar və hələlik onların arasında şüalanma xəstəliyinə düçar olan aşkar olunmayıb.