Şirvan. Əlibəy Zeynallı - APA. Şirvan şəhərində zəncirvari yol qəzası baş verib. Bu barədə APA-nın Mil-Muğan bürosuna Şirvan şəhər Polis Şöbəsindən bildirilib. Hadisə martın 27-də axşam saatlarında qeydə alınıb. Hacıqabul rayon sakini 1987-ci il təvəllüdlü Cavadov Xəyal Ənvər oğlu idarə etdiyi “Mercedes” markalı 90 GE 521 dövlət nişan nömrəli avtomobilin idarə etməsini itirib. Sürət həddini aşan avtomobil yolun kənarında olan maneəyə və işıq dirəyinə çırpılaraq bir neçə dəfə fırlanıb, qarşıda dayanan başqa 5 avtomobilin zəncirvari olaraq bir-biri ilə toqquşmasına səbəb olub. Qəza zamanı xəsarət alan olmasa da, avtomobillərə ciddi ziyan dəyib.
Faktla bağlı Şirvan Polis Şöbəsində araşdırma aparılır.