Şəhid ailəsinə məxsus əmlak yanıb

Göyçay rayonunun Veysəlli kəndində yanğın hadisəsi baş verib. ANS PRESS-in bölgə müxbirinin verdiyi məlumata görə, ötən gecə saat 21:00 radələrində kənd sakini, şəhid atası Mehdiqulu Quliyevə məxsus mal-qara tövləsində yanğın olub. Hadisə yerinə Göyçay yanğından mühafizə hissəsinin 3 yanğınsöndürən maşını və canlı qüvvəsi cəlb edilib.

Yanğın zamanı tövlə və onun damındakı 50 bağ ot yansa da, mal-qara, eləcə də yaxınlıqdakı ev alovdan mühafizə edilib. Yanğın zamanı xəsarət alan olmayıb.

Qeyd edək ki, yanğının hansı səbəbdən baş verdiyi hələ ki məlum deyil. Faktla bağlı araşdırma aparılır.