Bu gün Qusarda ağır yol qəzası baş verib. ANS PRESS-in Şimal bürosunun verdiyi məlumata görə, axşam saatlarında Qusar-Xudat yolunun 24-cü kilometrliyində, Qusarın Çubuqçu kəndi ərazisində piyadanın ölümü ilə nəticələnən yol qəzası olub.

Belə ki, Qusarın Lanqu kəndinin sakini, 1960-cı il təvəllüdlü Yəhyayev Minyəz Abduləziz oğlu özünün idarə etdiyi “Mercedes” markalı avtomobillə yolu keçən 1956-cı il təvəllüdlü kənd sakini Qabil Mövlud oğlu Mollayevi vurub. Piyada hadisə yerində keçinib.

Qusar Rayon Baş Polis İdarəsinin müstəntiqi Məhəmməd İbrahimovun ANS PRESS-ə verdiyi məlumata görə, ilkin olaraq qəzanın baş vermə səbəbi kimi yolun qaranlıq olmasıdır. Onun sözlərinə görə, yolun zəif işıqlandırılmasına baxmayaraq, piyada qəflətən avtomobil getdiyi yola çıxıb.

Hadisə ilə bağlı Qusar rayon Polis İdarəsində Cinayət Məcəlləsinin 263.2 maddəsi ilə cinayət işi açılıb. Avtotexniki ekspertizadan sonra hadisənin təfərrüatları açıqlanacaq. Hazırda piyadanın meyiti Qusar şəhər morqundadır, araşdırma aparılır.