Ötən gün saat 20:10 radələrində Qubada 4 nəfərin xəsarət alması ilə nəticələnən ağır yol-nəqliyyat hadisəsi baş verib. Quba rayon Polis Şöbəsinin baş müstəntiqi Rövşən Turabovun verdiyi məlumata görə, Quba şəhərinin Əliqulu Nərimanov və Qələbə küçələrinin kəsişdiyi ərazidə Bakı şəhər sakini 1993-cü il təvəllüdlü Əlizadə Elşən Rövşən oğlunun idarə etdiyi 10 NA 787 dövlət nömrə nişanlı “VAZ 2107” markalı avtomobil , digər Bakı şəhər sakini olan 1965-ci il təvəllüdlü Əhmədbəyli Fuad Tağı oğluna məxsus 10 TC 787 dövlət nömrə nişanlı “ MAN” markalı sərnişin avtobusu ilə toqquşub. Daha sonra isə zərbənin gücündən “VAZ 2107” markalı avtomobil yolun kənarındakı elektrik dirəyinə çırpılıb. Nəticədə “VAZ 2107” markalı avtomobilin sürücüsü Elşən Əlizadə və maşında olan digər üç sərnişin Bakı şəhər sakinləri 1993-cü il təvəllüdlü Fərhadov Rahib Ərzuman oğlu, 1992-ci il təvəllüdlü Teymurlu Cahandar İsmayıl oğlu və 1986-cı il təvəllüdlü Əliyev İlkin İsfəndiyar oğlu müxtəlif bədən xəsarətləri ilə Quba Mərkəzi rayon Xəstəxanasının Cərrahiyyə şöbəsinə yerləşdiriliblər. Cərrahiyyə şöbəsinin müdiri Gəray Qurbanov APA-ya bildirib ki, xəsarət alanlardan Cahandar Teymurlu, Elşən Əlizadə və Rahib Fərhadovun vəziyyəti ağırdır. Faktla bağlı Quba rayon Polis Şöbəsində araşdırma aparılır.