Qızıl mağazasının sahibinə silahlı hücum olub. ANS PRESS-in Daxili İşlər Nazirliyinin rəsmi saytına istinadla verdiyi məlumata görə, basqın Lerik rayonunun Xəlifəküçə kəndi ərazisində qeydə alınıb. Belə ki, "VAZ-2106" markalı avtomaşında olan 3 naməlum şəxs, Lerik şəhərindəki qızıl mağazasının sahibi Məhləband kənd sakini Nazim Hüseynova hücum ediblər. Həmin şəxslər qızıl mağazasının sahibinin idarə etdiyi "VAZ-2106" markalı avtomaşını saxlayıb, tapança və bıçaqla onu hədələyərək, avtomaşındakı 10000 manat dəyərində qızıl əşyalarını, 600 manatını və mobil telefonunu ondan alıblar. Soyğunçular hadisə yerindən getdikdən sonra Lənkəran-Lerik yolunun 25-ci km-də avtomaşınlarını maneəyə vurduqlarından, onu tərk ediblər.

Lerik RPŞ əməkdaşlarının həyata keçirdikləri əməliyyat-axtarış tədbirləri nəticəsində hadisəni törətmiş Bakı şəhər sakinləri Orxan Qasımov, Amil Quliyev və Asim Cəfərov tutulmuş, onlardan silah qisimində istifadə etdikləri bıçaq və oyuncaq tapança götürülüb.