Azərbaycanın cənub bölgəsində yaranan qasırğa Lerik rayonunda ciddi fəsadlar törədib. ANS PRESS-in bölgə müxbirinin məlumatına görə, dünən axşam saatlarından başlayan qasırğa nəticəsində rayonun elektrik, telekommunikasiya təsərrüfatlarına, ictimai tikililərin dam örtüklərinə, fərdi yaşayış evlərinə müxtəlif dərəcədə ziyan dəyib. Sürəti saniyədə 28 metrə çatan qasırğa rayonun enerji təsərrüfatını demək olar ki, iflic vəziyyətinə salıb. Rayonu enerji ilə təchiz edən Masallı-Televar-Lerik və Lənkəran-Hamarat-Lerik 35 min kilovoltluq yüksək gərginlikli hava xətlərində qəzaların baş verməsi səbəbindən rayonun bütün ərazisində axşam saatlarından enerjinin verilməsi dayandırılıb. Qəzalar qismən aradan qaldırıldıqdan sonra rayon mərkəzinə və bəzi yaxın kəndlərə enerjinin verilməsi bərpa olunub.

Lerik rayon Fövqəladə Hallar Komissiyasının sədr müavini Baləli Rzayev bildirib ki, külək rayonun ictimai tikililərinə də ziyan vurub: “Günortaya yaxın “Azərenerji”nin Masallı briqadasının köməyi ilə yüksək gərginlikli elektrik xətlərində qəza aradan aldırılıb. Günorta radələrində rayon mərkəzinə və 40 kəndə enerji verilişi artıq bərpa olunub. Rabitədə də külək fəsadlar törədib. 80-dan yuxarı rabitə dirəyi aşıb, Yardımlı ilə sərhəd olan kəndlərdə 8 ATS-lə əlaqə kəsilib. Bu isə təqribən 25-28 kənd deməkdir”.

Qeyd edək ki, artıq rayonda qasırğa nəticəsində yaranmış fəsadların aradan qaldırılması istiqamətində təmir bərpa işlərinə başlanılıb. Lerik rayon mərkəzi xəstəxanasının, uşaq xəstəxanasının, 3 saylı şəhər orta məktəbin və digər ictimai binaların dam örtüklərinə dəyən ziyan aradan qaldırılmaqdadır. Güclü külək nəticəsində ayrı ayrı kəndlərdə vətəndaşlara dəyən ziyan araşdırılır.

Qeyd edək ki, hazırkı saatlarda Lerikin 121 kəndi işıqsızdır. Enerjinin olmaması səbəbindən bu kəndlərlə rabitədə də problemlər qalmaqdadır. Hava şəraitinə gəlincə isə, güclü olmasa da, bölgədə isti cənub küləyi müşahidə olunur.