Bu gün axşam saat 20:00 radələrində Bakı şəhəri, Xətai rayonu, Yusif Səfərov küçəsində piyadanın vurulması ilə nəticələnən yol nəqliyyat hadisəsi baş verib. Hadisə şahidlərinin ANS PRESS-ə verdiyi məlumata görə, “Cristal Plaza” biznes mərkəzinin qarşısında baş verən hadisə zamanı ağ rəngli “Range Rover” markalı maşın tərəfindən vurulan gənc zərbənin gücündən həmin istiqamətdə hərəkət edən “VAZ 21011” markalı maşının altına yuvarlanıb.

Piyadanı vurulmuş şəxsin avtomobili ilə Əfəndiyev adına 2 saylı xəstəxanaya çatdırılan gəncə ilkin tibbi yardım göstərildikdən sonra, o, təcili yardım maşını ilə Mərkəzi Kliniki Tibbi Mərkəzə köçürülüb. Yaralının cibindən çıxan çağırışçı vərəqəsinə görə, həmin şəxs 18 yaşlı Qafarov Xəqani Dilavər oğludur.

Baş vermiş hadisə zamanı ərazidə xeyli sayda patrul əməkdaşının olmasına baxmayaraq, həmin ərazidə yerləşən Bakı şəhər Baş Polis İdarəsindən və Xətai rayon Polis İdarəsindən hadisə ilə bağlı heç bir məlumatın olmadığı bildirilib.
ANSPRESS