Bakının Xətai rayonu ərazisi Nobel prospektində iki “VAZ-2107” markalı avtomobil toqquşub. Avtomobillərdən biri Cəfərov Vüqar Həsən oğluna məxsus, digərinin sürücüsü isə hələlik dəqiqləşdirilməyib. Sürücü Vüqar Cəfərov qəzanın öz avtomobili ilə Suraxanı rayonundan şəhər istiqamətində hərəkət edərkən baş verdiyini deyib: “Mən Naxçıvanski tərəfdən gəlirdim. Gördüm ki, arxadan qara bir “2107” gah sağa, gah da sola hərəkət edərək sürətlə gəlir. Mənim maşınıma çırpıldı, nəticədə mənim avtomobilim bardyorun üstünə çıxdı”.

Vüqar Cəfərov Avtomobildən düşən cavanların onu danışığa çağırdığını, daha sonra öz avtomilləri ilə ərazidən uzaqlaşdıqlarını deyib: “Qabaqda saxladılar. Cavan uşaqlar idi. Dedi, dayı, gəl çəkək kənara həll edək. Daha sonra gördüm maşına oturub aradan çıxdılar”.

Qəza zamanı sürücü Vüqar Cəfərov xəsarət almasa da ona məxsus avtomobilə ciddi ziyan dəyib. Hadisənin səbəbləri Xətai rayon DYPŞ-nin müfəttişləri tərəfindən araşdırılır. Qəzaya səbəbkar olan digər “VAZ-2107” sürücüsünün yerinin müəyyən edilməsi üçün müvafiq tədbirlər icra olunur.