Bu gün Azərbaycan Milli qəhrəmanı Tofiq Hüseynovun doğum günüdür. Tofiq Mirsiyab oğlu Hüseynov 1954-cü il aprelin 19-da Xocalı şəhərində anadan olub. Xocalı şəhər orta məktəbində hərbi hazırlıq müəllimi işləyib, kapitan rütbəsinə qədər yüksəlib. O, 1991-ci ildə Xocalı Özünü Müdafiə Taborunun komandiri olub, “Mixaylo” ləqəbilə tanınıb. O, rəhbərlik etdiyi taborla birlikdə Meşəli, Naraguğ, Mehdikənd və digər istiqamətlərdə qəhrəmanlıqla vuruşmuş, düşmənin hərbi texnikalarını məhv etmişdir. Mehdikənd əməliyyatı zamanı düşmənin artilleriyası, “Alazan” qurğusu məhv edilib, xeyli erməni öldürülüb, 10 nəfər əsir götürülüb. Bu əməliyyata görə ona mayor rütbəsi verilib. O, 1992-ci il fevralın 26-da düşmənlə axıra qədər vuruşub, dinc əhalinin xeyli hissəsinin təhlükəsiz yerə çıxmasını təmin edib. O, axırıncı gülləsinə qədər vuruşub. Sonda qumbara ilə özünü partladıb, özü ilə birlikdə 10 nəfərə yaxın ermənini də məhv edib.

Qeyd edək ki, Tofiq Hüseynov Bakı şəhərində Şəhidlər xiyabanında dəfn edilib.