Bu gün saat 13:46 radələrində Bakının Maştağa qəsəbəsinin Savalan yaşayış massivində yerləşən evlərdən birində güclü partlayış baş verib. Qəsəbə sakinlərinin ANS PRESS-ə verdiyi məlumata görə, hadisənin baş verməsinə qaz sızması səbəb olub.

Kənd sakinlərinin sözlərinə görə, insident magistral qaz xəttindən yerin altı ilə evə çəkilən xəttə qaz sızmasından baş verib. Hadisə nəticəsində üç otaqlı mənzilin bir otağı yararsız vəziyyətə düşüb.

Xoşbəxtlikdən evdə kirayə qalan Mirzəyeva Leyla Yaqub qızı və onun yaxınları mənzildə olmayıb.

Hadisə ilə bağlı Fövqəladə Hallar Nazirliyi və Bakı şəhər Qaz İstismar İdarəsinə müraciət olunsa da, müvafiq qurumlardan bir xəbər çıxmayıb. Yalnız Qaz İstismar İdarəsinin əməkdaşları hadisə yerinə gələrək baxmaqla kifayətləniblər.

Xatırladaq ki, təqribən bir ay bundan öncə də, sözügedən ərazidəki evlərdən birində qaz sızmasından baş verən partlayış nəticəsində Məmmədova Sədaqət Yəhya qızı dünyasını dəyişmişdi. ANSPRESS