Kürdəmirdə ev yanaraq külə döndü

Kürdəmir rayonunda baş verən yanğında 87 yaşlı qadın ölüb. Rayon Polis Şöbəsindən APA-ya verilən məlumata görə, hadisə bu gün saat 14:30 radələrində Kürdəmirin Xəlsə kəndində qeydə alınıb.

Kənd sakini, 1925-ci il təvəllüdlü Kərimova Çimən Rəhim qızına məxsus ümumi sahəsi 60 kvadratmetr olan ikiotaqlı evdə yanğın baş verib. Yanğının qarşısının alınması üçün rayon mərkəzindən 46 kilometr aralıda yerləşən kəndə iki yanğınsöndürən maşın və canlı qüvvə göndərilib. Hadisə barədə rayon yanğından mühafizə hissəsinə gec məlumat verildiyindən yanğının qarşısını vaxtında almaq mümkün olmayıb.

Hadisə nəticəsində mənzildə tənha yaşayan ev sahibi, 87 yaşlı Çimən Kərimova yanaraq dünyasını dəyişib. İlkin ehtimala görə, yanğına elektrik naqillərində baş verən qısaqapanma səbəb olub.

Faktla bağlı araşdırma aparılır.