Bakıda 3 nəfərin xəsarət alması ilə nəticələnən yol-qəza hadisəsi baş verib. Hadisə şahidlərinin ANS PRESS-ə verdiyi məlumata görə, qəza bu gün saat 12.20 radələrində Fəhlə prospektinin Xətai rayonundan keçən hissəsində baş verib.

Şəhər istiqamətində hərəkət edən “VAZ-2106” markalı minik maşını sürücünün idarəetməsindən çıxaraq yol kənarındakı işıq dirəyinə çırpılıb. Nəticədə maşın deformasiyaya uğrayaraq tam yararsız hala düşüb. Sürücü və onun iki qadın sərnişini müxtəlif dərəcəli bədən xəsarətləri alaraq Təcili Tibbi Yardım maşını ilə xəstəxanaya aparılıb. Yaralıların adları hələlik müəyyən olunmayıb.

Xətai rayon Polis İdarəsindən ANS PRESS-ə verilən məlumata görə, hadisə yerinə əməliyyat qrupu göndərilib. Hadisənin dəqiq səbəbi aparılan texniki və tibbi ekspertizadan sonra dəqiqləşəcək.