Bakıda soyğunçuluq və quldurluqla məşğul olan şəxs tutulub. Bakı Şəhər Baş Polis İdarəsindən ANS PRESS-ə verilən məlumata görə, Binəqədi Rayon Polis İdarəsi Cinayət Axtarış Şöbəsinin 6-cı və 7-ci bolməsi əməkdaşlarının birgə keçirdikləri əməliyyat tədbirləri nəticəsində soyğunçuluqda və quldurluqda şübhəli bilinən Şabran rayon sakini Ceyhun Orucov iyunun 20-də tutularaq istintaqa təhvil verilib.

Aparılmış istintaq zamanı məlum olub ki, o, fevralın 14-ü 2009-cu il tarixdə Biləcəri qəsəbəsində yaşayan Günel Əhmədovanın evinə açıq qapıdan daxil olmaqla, hədə-qorxu gələrək pul və qızıl-zinət əşyalarını tələb edib. G. Əhmədova pul və qızıl-zinət əşyalarının olmadığını bildirdikdə isə onu döyərək qaçıb. Elə eyni gündə Biləcəri qəsəbəsi M. Aslanov küçəsində yaşayan Xatirə Mahmudovanın mənzilinə elektrik xətlərini yoxlamaq adı ilə daxil olub. Ona hədə-qorxu gələrək 400 ABŞ dolları, 80 manat və qızıl-zinət əşyalarını alıb. C. Orucov daha sonralar da özünü işıq idarəsinin işçisi kimi təqdim edərək Biləcəri qəsəbəsi ərazisində bir neçə mənzilə daxil olaraq soyğunçuluq edib.

Belə ki, o, yanvarın 21-də Leyla Məmmədovanın, martın 29-da Fatma Ağayevin, aprelin 12-də Vüsalə Mikayılovanın, mayın 5-də isə Sevda Məmmədovanın mənzilindən pul, qızıl-zinət əşyaları və sonuncudan əlavə olaraq mobil telefon götürüb.

Faktla bağlı cinayət işi başlanılıb, araşdırma aparılır. ANSPRESS