Türkiyənin Yozqat bölgəsində yerləşən ticarət mərkəzlərindən birində faciə baş verib. “Yimpaş” Ticarət Mərkəzində sərnişin liftində baş verən qəza zamanı bir nəfər ölüb, iki nəfər isə yaralanıb.

Qəzanın baş verməsinə səbəb isə 6 nəfər üçün nəzərdə tutulan liftə 11 nəfərin minməsi olub. Ticarət mərkəzinin beşinci mərtəbəsində yerləşən Mədəniyyət Mərkəzinə qalxmaq üçün liftə minən qadınların ağırlığına tab gətirməyən liftin qaldırıcı trosunun qırıldığı ehtimal olunur.

Hadisə yerinə çağırılmış xilasedicilər tərəfindən liftin zirzəmi hissəsində köməksiz vəziyyətdə qalan qadınlar çıxarılıb və xəstəxanaya çatdırılıb. Üzərində cərrahiyyə əməliyatı aparılan 66 yaşlı Muteber Beneklinin həyatını xilas etmək mümkün olmayıb. Digər yaralılar isə ilk yardımdan sonra evə buraxılıblar. ANSPRESS