Fövqəlada Hallar Nazirliyi Quba rayonunda baş verən yanğınlarla bağlı məlumat açlqlayıb. ANS PRESS-in nazirliyin mətbuat xidmətinə istinadən verdiyi məlumata görə, Quba şəhərində vətəndaşa məxsus ümumi sahəsi 187 kv.m olan mansarda tipli evin yanar konstruksiyaları və ev əşyaları, ümumi sahəsi 96 kv.m olan köməkçi tikilinin yanar konstruksiyaları və içərisindəki əşyalar, habelə hər birinin sahəsi 18 kv.m olan 2 talvarın yanar konstruksiyaları (ümumi 319 kv.m) yanıb. Yaxınlıqdakı evlər yanğınsöndürənlər tərəfindən yanğından mühafizə olunub. Yanğın saat 18:03-də yanğınsöndürənlər tərəfindən söndürülüb.

Qeyd edək ki, FHN-nin digər məlumatında bildirilir ki, Quba şəhərində hər birinin sahəsi 20 kv.m olan 2 qarajın yanar konstruksiyaları yanıb. Yaxınlıqdakı tikililər yanğınsöndürənlər tərəfindən yanğından mühafizə olunub. Yanğın saat 12:50-də yanğınsöndürənlər tərəfindən söndürülüb.

Xatırladaq ki, ötən gün Quba rayon İcra Hakimiyyətinin (RİH) binası qarşısında kütləvi etiraz aksiyası keçirilib. Aksiya iştirakçıları bir neçə gün əvvəl Quba RİH başçısı Rauf Həbibovun internetdə yayılan videosuna etiraz ediblər. Etirazçılar icra başçısına məxsus evi və qarajları da yandırmışdılar.