Bu gün Ələt-Astara yolunun 47-ci kilometrliyində ölümlə nəticələnən ağır yol nəqliyyat hadisəsi baş verib. Hadisə yerində olan Baş Dövlət Yol Polisinin 10-cu tağım komandiri, polis kapitanı Qulu Quluyevin ANS PRESS-ə verdiyi məlumata görə, saat 11 radələrində “VAZ 2107” markalı 10 VS 479 dövlət nömrə nişanlı avtomobillə “VAZ 2106” markalı 44 AE 218 dövlət nömrə nişanlı maşın toqquşub.

““VAZ 2107” markalı avtomobil Bakıdan Astara istiqamətində hərəkət edirmiş, bu zaman Astaradan Bakıya gələn “VAZ 2106” markalı maşınla toqquşub. İlkin ehtimala görə, “VAZ 2106” markalı avtomobil qarşı tərəfin yoluna çıxıb. Hadisənin dəqiq səbəbləri istintaq araşdırmasından sonra bilinəcək”, - deyə Qulu Quluyev vurğuladı.

Hadisə nəticəsində hər 2 sürücü dünyasını dəyişib. Ölənlərin şəxsiyyəti araşdırılır. ANSPRESS