Ötən gecə Binəqədi rayonu Binəqədi-Biləcəri yolunda avtomobil qəzası baş verib. Qəza iki “Mercedes”in toqquşması nəticəsində meydana gəlib. Qəza vaxtı Əli Quliyevin idarə etdiyi nəqliyyat vasitəsi yolun qarşı hissəsində hərəkətdə olan Turan Hacıyevin idarə etdiyi avtomobilə çırpılıb. Qeyd edək ki, “Mercedes”lərdən biri daha sonra yolun kənarında dayanan “VAZ-2107” markalı avtomobilə də çırpılıb.

Qəza zamanı maşınlara ciddi ziyan dəysə də, xoşbəxtlikdən nə sürücülər, nə də sərnişinlər arasında xəsarət alan olmayıb. Qəza baş verən ünvanda isə Binəqədi rayon dövlət yol polis şöbəsinin əməkdaları tərəfindən ilkin araşdırmalar aparılıb. Yol nəqliyyat hadisəsinin səbəblərinə təyin ediləcək ekspertizaların rəyindən sonra aydınlıq gətiriləcək.