Azərbaycanın Bərdə rayonunda qətl törədilib. Respublika Prokurorluğunun mətbuat xidmətinin rəhbəri Eldar Sultanov APA-ya bildirib ki, hadisə iyulun 11-də, saat 23:00 radələrində Bərdə rayon Kələntərli kəndində qeydə alınıb. Kənd sakini, 1941-ci il təvəllüdlü Rzayev Mərkəz Salman oğlu ailə münaqişəsi zəminində aralarında yaranmış mübahisə zamanı oğlu, 1976-cı ildə anadan olmuş Elşən Rzayevə yaşadığı evdə üstündə gəzdirdiyi bıçaqla xəsarət yetirib, nəticədə sonuncu aldığı xəsarətlərdən Bərdə Şəhər Mərkəzi Xəstəxanasında dünyasını dəyişib.

Faktla bağlı Bərdə Rayon Prokurorluğunda Cinayət Məcəlləsinin 120.1-ci maddəsi ilə cinayət işi başlanıb.

Rayon Prokurorluğu və Rayon Polis Şöbəsinin əməkdaşları tərəfindən həyata keçirilmiş istintaq hərəkətləri və əməliyyat-axtarış tədbirləri nəticəsində Mərkəz Rzayev tutularaq istintaqa cəlb edilib. M. Rzayev tutulan zaman cinayətin aləti olan bıçağı təqdim edib və şübhəli şəxs qismində dindirilərkən törətdiyi əməli tam etiraf edib.

Hazırda cinayət işi üzrə istintaq davam etdirilir. anspress