Bu gün Bakının Nizami rayonu ərazisində yanğın baş verib. Yanğın Nizami rayonu, 4-cü köndələn küçəsi, 1 ünvanında yerləşən “Azərinşaat” MMC-yə məxsus inşaat materialları anbarında baş verib.

Hadisə zamanı ətrafı qara düman bürüyüb. Dövlət Yanğından Mühafizə Xidmətinin qərargah rəisi Əkbər Novruzovun verdiyi məlumata görə, yanğın zamanı anbarda tol yığılmış 50 kv.m sahə və 200 kv.m dam örtüyü yanıb. Əraziyə Fövqaladə Hallar Nazirliyinin 6 yanğınsöndürən maşını və rayon polis idarəsinin çoxsaylı əməkdaşları cəlb edilib.

İlkin ehtimallara görə, yanğından xəsarət alan olmayıb. Yanğının anbarın damına bitum çəkilən zaman və ya aparılan qaynaq işlərindən baş verdiyi ehtimal edilir. Dəqiq səbəblər isə ərazidə araşdırma aparan təhqiqat qrupunun rəyindən sonra məlum olacaq.