Bu gecə Bakıda 3 nəfərin xəsarət alması ilə nəticələnən yol-nəqliyyat hadisəsi baş verib. Paytaxtın Sabunçu rayonunda Mustafa Quliyevin idarə etdiyi “QAZ-3110” markalı avtomobil Elnur İbrahimova məxsus “Tofaş” markalı maşlnla toqquşub. Daha sonra “Tofaş” “VAZ-2106” markalı başqa avtomobilə çırpılıb. “QAZ-3110”-un xəsarət alan sürücüsü Mustafa Quliyev və maşında olan sərnişin Xəyala Quliyeva, o cümlədən “Tofaş”ın sürücü ağır vəziyyətdə 3 saylı şəhər klinik xəstəxanasına çatdırılıb. Xəstəxanadan verilən məlumata görə, hər üç şəxsin həyatı üçün təhlükə olmasa da, onların müalicəsi reanimasiya şöbəsində davam etdirilir.

Hadisə yerinə cəlb edilən yol polisi əməkdaşları hadisənin ilkin səbəblərinə aydınlıq gətiriblər. Onların sözlərinə görə, hadisəyə yolda aparılan təmir işləri və sürücülərin bunu nəzərə almaması səbəb olub.

“VAZ-2106”-nın sürücüsü Elşən Hüseynov da qəzanı yolda aparılan təmir işləri ilə əlaqələndirib. Onun ANS-ə verdiyi məlumata görə, idarə etdiyi avtomobillə Elnur İbrahimovun idrə etdiyi “Tofaş” maşını eyni istiqamətdə və 5-6 metrlik məsafə ilə hərəkət edirmiş. Qarşıdan gələn “QAZ-3110”-un sürücüsü Mustafa Quliyev yoldakı çalanı son anda görüb və manevr etmək istəyərkən toqquşma olub.

Sabunçu Rayon Polis İdarəsində faktla bağlı araşdırma aparılır.