Bakıda maşın oğurlayan şəxs ələ keçib. Daxili İşlər Nazirlyinin mətbuat xidmətindən verilən məlumata görə, hadisə fevralın 18-i saat 13.57 radələrində baş verib.

Belə ki, metronun Neftçilər stansiyasının yaxınlığında naməlum şəxs Bakı şəhər sakini Aydın Hacıyevə məxsus "VAZ-2107" markalı avtomaşına sərnişin qismində oturub Güzdək kəndinə gedəcəyini bildirib. Güzdək kəndinə çatdıqda həmin şəxs A.Hacıyevi bıçaqla hədələyərək avtomaşınını ondan alaraq oradan uzaqlaşıb.

Həyata keçirilmiş təxirəsalınmaz əməliyyat-axtarış tədbirləri nəticəsində Qaradağ rayonu ərazisində DİN Baş Dövlət Yol Polis İdarəsinin Yol Patrul Xidmətinin Stasionar Postunda avtomaşın sürücüsü və sərnişini ilə birgə saxlanılıb, Abşeron Ryonu Polis Şöbəsinə təhvil verilib.

Aparılan araşdırmalar zamanı həmin şəxslərin Şirvan şəhər sakini, əvvəllər məhkum olunmuş Ədalət Səttarov və Hacıqabul rayon sakini Yalçın Yusifov olmaları, hadisənin Ə.Səttarov tərəfindən törədilməsi, Y.Yusifovun isə avtomaşında sərnişin qismində getməsi müəyyən edilib.

Faktla əlaqədar cinayət işi başlanıb. ANSPRESS