Bakıda 4 nəfərin yaralanması ilə nəticələnən ağır yol-nəqliyyat hadisəsi baş verib. Hadisə şahidlərinin ANS PRESS-ə verdiyi məlumata görə, saat 16:40 radələrində Binəqədi şosesi ilə hərəkət edən “KamAZ” markalı yük maşını 108 saylı marşrut avtobusu ilə toqquşub.

Nəticədə avtobusda olan sərnişinlərdən 4 nəfər müxtəlif dərəcəli bədən xəsarətləri alaraq Təcili Tibbi Yardım maşınları ilə Kliniki Tibbi Mərkəzə və Travmotologiya İnstitutuna aparılıb.

Travmotologiya İnstitutundan ANS PRESS-ə verilən məlumata görə, xəstəxanaya gətirilən yaralıların ikisi də qadındır. Yaralananlardan biri 56 yaşlı Fatmai kənd sakini Xanım Əhməd qızı Hüseynovadır. Digər yaralının şəxsiyyəti isə hələlik bilinmir. Hər iki xəstənin vəziyyəti orta-ağırdır.

Ərazi üzrə Təcili Yardım Stansiyasından ANS PRESS-ə verilən məlumata görə, xəsarət alanlardan biri 5 yaşlı uşaqdır.

Hadisənin hansı sürücünün səhvi ucbatından baş verdiyi qəza yerinə yollanan Binəqədi rayon Polis İdarəsinin əməkdaşları tərəfindən araşdırılır.