Bakıda mənzilə basqın edən şəxslər tutulub. Bakı şəhər Baş Polis İdarəsindən verilən məlumata görə, martın 6-sı saat 22:30 radələrində naməlum şəxslər İnşaatçılar prospektində kirayədə yaşayan Bakı şəhər sakinləri Orxan Məmmədov və Fərid Məmmədova yaşadıqları mənzildə tapança ilə hədə-qorxu gələrək 2 ədəd noutbuk və 3 ədəd mobil telefon götürüblər.

Yasamal rayon Polis İdarəsi Cinayət Axtarış İdarəsi və 27-ci polis bölməsi əməkdaşlarının birgə keçirdiyi əməliyyat tədbirləri nəticəsində quldurluqda şübhəli bilinənlərdən biri, Bakı şəhər sakini Timur Məmmədov martın 26-da tutulub. Ondan 1 ədəd “Baykal” markalı pnevmatik tapança götürülüb.

Təxirəsalınmaz əməliyyat tədbirləri nəticəsində cinayətin digər iştirakçısı Emil Məmmədov isə martın 28-də yaxalanıb.

Faktla bağlı araşdırma aparılır.