Bakıdan mağazadan içərisində 32 min dollar, qızıl brilyant olan seyfi oğurlayan şəxslər tutulub. Bakı Şəhər Baş Polis İdarəsindən ANS PRESS-ə verilən məlumata görə, oğurluq hadisəsi fevralın 3-nə keçən gecə olub. Belə ki, Ə.Rəcəbli küçəsində yerləşən "Life center" ticarət mərkəzində Bakı şəhər sakini İsgəndər Məcidova məxsus mağazadan qapını sındırma yolu ilə içərisində 32 min ABŞ dolları, brilyant və qızıl-zinət əşyaları olan seyf oğurlanıb.

Daxili İçlər Nazirliyi Baş Cinayət Axtarış İdarəsinin, Bakı şəhər Baş Polis İdarəsi Cinayət Axtarış İdarəsi, Nərimanov Rayon Polis İdarəsi Cinayət Axtarış Şöbəsi və 18-ci Polis Bölməsinin əməkdaşlarının keçirdikləri əməliyyat tədbirləri nəticəsində oğurluqda şübhəli bilinən, Bakı şəhər sakinləri Məlik Məlikov, Səbuhi Məmmədov və Vasif İsmayılov fevralın 19-da tutulublar.

Cinayətin digər iştirakçıları AR Cinayət Məcəlləsinin 177-ci maddəsi (oğurluq) ilə axtarışda olanlar Eldəniz Məmmədov və Bəymirzə Həsənov isə martın 2-də Nərimanov Rayon Polis İdarəsi Cinayət Axtarış Şöbəsi və 18-ci polis bölməsi əməkdaşları tərəfindən yaxalanıb.