Ötən gecə Bakının Xətai rayonu ərazisindəki hündürmərtəbəli binalardan birində yanğın baş verib. Hadisə Məhəmməd Hadi küçəsində hələ tam olaraq istifadəyə verilməmiş 16 mərtəbəli bir binada qeydə alınıb. Yanğın binanı elektrik enerjisi ilə təchiz edən elektrik naqillərində baş verib.

Dərhal hadisə yerinə gələn Fövqəladə Hallar Nazirliyi (FHN) dövlət yanğından mühafizə hissəsinin əməkdaşları 2-ci və 3-cü mərtəbələrdə meydana gələn yanğının yuxarı mərtəbələrə yayılmasının qarşısını alıb. Binada söndürmə işləri aparılarkən burada yaşayan sakinlər də evakuasiya edilib.

Qeyd edək ki, sözügedən binada təxminən 7-8 ailə məskunlaşıb. Yanğın nəticəsində elektrik xətləri sıradan çıxdığı üçün həmin sakinlər gecəni qaranlıqda keçirməli olublar.

FHN dövlət yanğından mühafizə hissəsi təhqiqat qrupu faktın meydana gəlmə səbəblərini araşdırır. ANSPRESS