Bu gün saat 11:00 radələrində Bakının Sabunçu rayonu Maştağa qəsəbəsində ağır yol qəzası baş verib. Hadisə şahidlərinin ANS PRESS-ə verdiyi məlumata görə, Maştağa qəsəbəsi Olimpiya Kompleksinin qarşısında “Azsamand” markalı avtomobillə “VAZ 2107” markalı avtomobil toqquşub.

Bakı şəhəri Təcili və Təxirəsalınmaz Tibbi Yardım Stansiyasının baş həkiminin operativ işlər üzrə müavini Rauf Nağıyevin ANS PRESS-ə verdiyi məlumata görə, qəza nəticəsində 1 nəfər ölüb, iki nəfər yaralanıb.

“Qəza nəticəsində 1 nəfər ölüb, 2 nəfər yaralanıb. Yaralılardan biri çənə sümüyünün travması ilə 1 saylı şəhər klinik xəstəxanasına, digər yaralı isə 3 saylı şəhər xəstəxanasına yerləşdirilib”, - deyə Rauf Nağıyev vurğulayıb.

Hadisə şahidlərinin sözlərinə görə, ölən “Azsamand” markalı avtomobilin sürücüsü olub. ANSPRESS