Ötən gün paytaxtın Nərimanov rayonunda Zahid Xəlil küçəsi, ev 7, mənzil 27 ünvanında baş verən dəhşətli qətl hadisəsinin təfərrüatı məlum olub. ANS TV-nin məlumatına görə, 38 yaşlı Elçin Babazadə 15 il əvvəl ayrıldığı həyat yoldaşı 34 yaşlı Gümüş Abdullayevanı qətlə yetirdikdən sonra bu barədə dostu Rizvan Ağabəyova məlumat verib.

R.Ağabəyov verdiyi ifadəsində bildirib ki, dostu səhər ona zəng edərək qətl törətdiyi barədə danışıb və birlikdə hadisə baş verən yerə gediblər: “O, Razin stansiyasında işləyir. Gəlib baxdıq ki, içəridə həqiqətən də meyit var. Dərhal 102 xidmətinə zəng elədim".

Dostunun sözlərinə görə, Elçin hadisəni niyə törətdiyini deməyib.

"Amma bilirəm ki, əvvəldən aralarında intiriqa var idi. İki qızı da var. Mən polisə məlumat verən zaman Elçin bankomatdan pul çıxarmaq adı ilə mənzilin qapılarını bağlayaraq hadisə yerindən qaçıb. Hadisə yerinə gələn Nərimanov rayon Polis İdarəsi və Prokurorluğunun əməkdaşları da mənzilə girə bilmədilər. Bu səbəbdən də polis əməkdaşları hadisənin baş verdiyi mənzilə qaldırıcı kran vasitəsilə daxil oldular”, deyə R. Ağabəyov bildirib.

Mənzilə daxil olan polis əməkdaşları Gümüş Abdullayevanın boğazı kəsilmiş vəziyyətdə qan içində olan cansız bədəni ilə rastlaşıblar. Qətlin təfərrüatlarının müəyyən edilməsi və hadisəni törədən şəxsin tutularaq istintaqa təhvil verilməsi üçün dərhal əməliyyat istintaq qrupu yaradılıb.

Polis əməkdaşları əvvəlcə keçmiş həyat yoldaşını qətlə yetirən Elçin Babazadə ilə telefon vasitəsilə əlaqə yaradaraq onu könüllü təslim olmağa dəvət ediblər. Amma Elçin polisləri də hədələyərək təslim olmayacağını bəyan edib. 18-ci polis bölməsinin əməliyyatçılarının “isti iz”lərlə keçirdiyi axtarış tədbirləri nəticəsində şübhəli şəxsin saxlanılmasına nail olunub. O, artıq rayon Prokurorluğuna təhvil verilib.

Faktla bağlı Nərimanov rayon Prokurorluğunda qəsdən adam öldürmə maddəsi ilə cinayət işi başlanılıb.