Hacıqabul rayonu ərazisində ölümlə nəticələnən ağır yol-nəqliyyat hadisəsi baş verib. Baş Dövlət Yol Polis İdarəsinin müstəntiqi Qəzənfər Mansurovun ANS PRESS-ə verdiyi məlumata görə, hadisə bu gün saat 13:40 radələrində Bakı-Qazax-Gürcüstan sərhədi yolunun 137-ci kilometrliyində qeydə alınıb.

Belə ki, Akif İbadulla oğlu Zeynalovun idarə etdiyi “Daewoo” markalı, 10 TC -167 dövlət nömrə nişanlı sərnişin avtobusu Ehtiram Elxan oğlu Həsənovun idarə etdiyi “VAZ 2107” markalı, 10 XC-157 dövlət nömrə nişanlı maşınla toqquşub. Nəticədə “VAZ-2107”də olan, Füzuli rayonunda yerləşən “N” saylı hərbi hissənin zabiti, baş leytenant, adı hələlik açıqlanmayan hərbçi hadisə yerində dünyasını dəyişib. Avtomobildə olan digər hərbçilər leytenant Pərviz Alı oğlu Əliyev və sürücü, tağım komandiri, leytenant Ehtiram Həsənov ağır xəsarət alıb.

Qeyd edək ki, yaralılar Şirvan şəhər Mərkəzi Xəstəxanasının reanimasiya şöbəsinə yerləşdirilib.