Paytaxtın Xətai rayonu ərazisində minik avtomobilinin yanması ilə nəticələnən qəza baş verib. Hadisə gecə saatlarında Babək prospekti ilə Yusif Səfərov küçəsinin kəsişməsində qeydə alınıb. 18 yaşlı Nağıyev Cavidan Şahin oğlunun Babək prospektindən şəhər istiqamətində idarə etdiyi “Qaz 3110” markalı avtomobil yanmazdan əvvəl yol ötürücüsünün beton dirəyinə çırpılıb. Hadisə sürücünün qəfildən idarəetməni itirməsi zamanı baş verib. Hadisə şahidləri isə avtomobilin yüksək sürətlə idarə edildiyini bildiriblər.

Sürücüdən başqa daha 4 nəfərin olduğu avtomobildə olan sərnişinlərdən biri ölüb. 26 yaşlı Həşimov Rüstəm Yusif oğlu 1 saylı xəstəxanaya çatdırılsa da onun həyatını xilas etmək mümkün olmayıb. Sürücü Cavidan Nağıyevə və onun sərnişinləri - 25 yaşlı Nuriyev Qoşqar Elbrus oğlu, 23 yaşlı Səfərov Emin Əli oğlu, 22 yaşlı Budaqov Tural Rahib oğlu və 18 yaşlı Şıxəliyev Vüsal İntiqam oğlunun vəziyyəti isə müvafiq tibbi yardımdan sonra qənaətbəxş hesab olunur. Onların müalicəsi xəstəxanada davam etdiriləcək. Yol qəzasının başvermə səbəblərinin araşdırılması ilə Xətai rayon polis idarəsinin əməkdaşları məşğuldur. Faktla bağlı cinayət işi başlanılıb.