Ötən gecə Nəsimi rayonu ərazisində iki avtomobilin toqquşması ilə nəticələnən yol nəqliyyat hadisəsi baş verib. Qəza, Mirsadiq Həsənovun idarə etdiyi “VAZ 2107” markalı avtomobilin Orxan Əhmədovun idarə etdiyi “VAZ 2106” markalı avtomobillə Azadlıq prospekti ilə həmin yolla kəsişən Hənifə Ələsgərov küçəsində toqquşması nəticəsində baş verib. Toqquşma nəticəsində avtomobillərə ziyan dəyib, yol ayrıcında quraşdırılmış və Daxili işlər nazirliyinin 102 xidmətinə məxsus müşahidə kamerasının dirəyi də zədələnib. Hadisə nəticəsində “VAZ 2106”də olan bir sərnişin müəyyən xəsarətlərlə hadisə şahidləri tərəfindən 1 saylı xəstəxanaya çatdırılıb.

Qəzanı araşdıran Nəsimi rayon polis idarəsinin əməkdaşları hadisənin qeydə alındığı ünvanda müəyyən araşdırmalar aparıb. Avtomaşınların sürücüləri hadisə barədə ziddiyyətli ifadələr verdikləri üçün onların hər ikisi polis idarəsinə aparılıb. Bununla yanaşı, idarənin əməkdaşları hər iki sürücünün ifadəsini dəqiqləşdirmək üçün müşahidə kamerasının çəkdiyi görüntülərdən də istifadənin nəzərdə tutulduğunu bildirirlər. Qəzanın dəqiq səbəbləri aparılacaq araşdırmalardan sonra müəyyən ediləcək.