Bu gün saat 13:15 radələrində Bakı-Qazax yolunun 70-ci kilometrliyində ölümlə nəticələnən ağır yol-nəqliyyat hadisəsi baş verib. Bu barədə hadisə yerində olan Bakı şəhər Dövlət Yol Polis İdarəsinin istintaq və tədqiqat şöbəsinin müstəntiqi Vaqif Nəcəfov ANS PRESS-ə məlumat verib. Belə ki, Bərdə-Bakı istiqamətində hərəkət edən “Mercedes-Benz” markalı, 16 BA 683 dövlət nömrə nişanlı sərnişin avtobusu ilə “VAZ-2106” markalı, 40 BB 740 dövlət nömrə nişanlı avtomobil toqquşub. Hadisə nəticəsində “VAZ-2106”-nın sürücüsü hadisə yerində həlak olub.

“Hadisəyə səbəb “VAZ-2106” markalı avtomobilin sürətlə Bakıdan Qazax istiqamətinə hərəkət edərkən, yoldan çıxması səbəb. Nəticədə 1986-cı il təvəllüdlü Pərviz Hidayət oğlu Məmmədovun idarə etdiyi sərnişin avtobusu ilə toqquşub. Hadisə nəticəsində həlak olan “VAZ-2106” markalı avtomobilin sürücüsünün kimliyi müəyyənləşdirilir”, - deyə Vaqif Nəcəfov vurğuladı.

Qeyd edək ki, xoşbəxtlikdən qəza nəticəsində avtobusda heç kəs xəsarət almayıb.

Faktla bağlı araşdırma aparılır. ANSPRESS