Amerika əsgəri 24 il həbs cəzası alıb

Amerika əsgəri 3 əfqanı öldürdüyünə görə 24 il həbs cəzası alıb. Hərbi tribunal 22 yaşlı Ceremi Morloku Əfqanıstanda 3 nəfərin qətlində iştirak etdiyinə görə azadlıqdan məhrum edib. Vaşinqtonda Lyüis-Makkord hərbi bazasında aparılan məhkəmə prosesində Ceremi Morlok qətli törətməkdə, ölümlə nəticələnən pusqu qurmaqda və qeyri-qanuni narkotik vasitələrdən istifadəyə görə özünü günahkar sayıb.

Ceremi Morlok Əfqanıstan müharibəsində törədilmiş hərbi cinayətlərdə əsas simalardan biridir. Morloka verilmiş hökm Əfqanıstanın Qəndahar əyalətində 3 əfqanın öldürülməsi ilə bağlı ilk məhkəmə işi olub. Həmin işlə bağlı ABŞ-ın Əfqanıstandakı ikinci piyada diviziyasının daha 4 hərbçisi də məhkəməyə sövq edilib. İstintaq qətllərin 2010-cu ilin yanvar-may aylarında törədildiyini üzə çıxarıb. Amerika hərbçiləri maraq xatirinə dinc sakinləri öldürməkdə, meyidlərlə şəkil çəkdirməkdə, hətta onların sümüklərini suvenir kimi saxlamaqda ittiham olunurlar.