“8-ci km” bazarında baş verən güclü yanğın söndürülüb

İyulun 18-də saat 22.40 radələrində “8-ci km” adlanan bazarda başlayan güclü yanğın saat 02.30 radələrində söndürülüb. APA-nın məlumatına görə, yanğının baş verdiyi binada tikinti materialları - taxta, boya və inşaatda istifadə olunan digər kimyəvi maddələr satılan mağazalar yerləşdiyindən yanğının söndürülməsi çətinliklə mümkün olub.

19 İyul 2009, 12:00 · Xəbərçi

Hadisə yerinə Nizami rayon İcra Hakimiyyətinin, Fövqəladə Hallar Nazirliyi Dövlət Yanğın Təhlükəsizliyi Xidmətinin rəhbərləri, polis əməkdaşları gəlib. Yanğının söndürülməsinə 15-ə yaxın yanğınsöndürən maşın cəlb olunub. Hadisə yerində olan tibb işçilərinin APA-ya verdiyi məlumata görə, yanğında xəsarət alan olmayıb.

Hazırda binada yanğın kəşfiyyatı aparılır, yanğının nə qədər sahəni əhatə etdiyi, səbəbləri və vurduğu ziyan müəyyənləşdirilir.

Qeyd edək ki, yanğın iyulun 18-də təxminən saat 22.40 radələrində Qara Qarayev prospektinin kənarında yerləşən üçmərtəbəli binanın damında başlayıb.

APA