“Beynəlxalq dəniz həftəsi” ərəfəsində Azərbaycanda “Xəzər həftəsi” başlayıb. Ekologiya və Təbii Sərvətlər Nazirliyinin mətbuat xidmətindən ANS PRESS-ə verilən məlumata görə, 27–30 sentyabr tarixlərində ETSN tərəfindən hazırlanmış müvafiq tədbirlər planına əsasən müxtəlif kütləvi, maarifləndirici tədbirlərə start verilib.

Bu gün Buzovna qəsəbəsinin sahil zolağında iməcilik təşkil olunub. İməcilikdə nazirliyin əməkdaşları ilə birgə bələdiyyə, ictimaiyyət, QHT nümayəndələri, o cümlədən məktəblilər də iştirak edib və Buzovna-Mərdəkan çimərlikləri arasındakı 52 hektar ərazi 20 m3-dən artıq bərk məişət və digər növ tullantılardan təmizlənib.

Nazirlik müvafiq tədbirlər planına uyğun olaraq “Xəzər həftəsi” çərçivəsində ictimaiyyətin maarifləndirilməsinə xidmət edən mədəni-kütləvi tədbirləri davam etdirəcək. ANSPRESS