Suraxanı rayonu Qaraçuxur qəsəbəsi Şadlinski küçəsində yerləşən həyət evlərindən birində naməlum heyvanın skeleti tapılıb. Ev sahibi Vaqif Məmmədov vaxtı ilə yaşadığı köhnə evi sökərkən belə mənzərə ilə qarşılaşıb.

Skeletin hansı heyvana məxsus olduğunu dəqiqləşdirmək məqsədilə hələlik söküntü işlərini yarımçıq saxlayan
ev sahibi iddia edir ki, bu skelet nəsli kəsilmiş dinozavrlara məxsusdur. Skeletin qəribə görünüşü və yuxarı ətraflarının olmaması Vaqif Məmmədovda belə düşüncə yaradıb.

Milli Elmlər Akademiyasının mütəxəssisi Elşad Əsgərov isə ev sahibinin zirzəmidə aşkarladığı skeletin dinozavrların nəslinə aid olmadığını deyir.

Mütəxəssis deyir ki, tapılan skelet böyük ehtimalla ev pişiyinə məxsusdur və belə deməyə mövcud skeletin quruluşu əsas verir: “Dinozavrlar dövründə Azərbaycan, ümumiyyətcə Qafqaz su altında- Dünya okeanının altında olub. Yalnız Böyük Qafqaz sıra dağları ada şəklində həmin okeandan müəyyən qədər çıxmış vəziyyətdə olub. Ona görə də, bizim ərazilərdə dinozavr axtarmaq əbəsdir. Bu söhbətlərə də bir dəfəlik nöqtə qoymaq lazımdır. Bu kimi vəziyyətlərdə heç kimin ağlına belə fikirlər gəlməsin”.