Müəmmər Qəddafini İnterpol axtaracaq

İnterpol devrilmiş Liviya lideri Müəmmər Qəddafi, onun oğlu Seyf-əl-İslam və hərbi kəşfiyyatın keçmiş rəhbəri Abdulla əl-Sənussinin həbsinə beynəlxalq order verib. İnteropolun saytında verilən məlumata görə, "qırmızı orderlər" Beynəlxalq Cinayət Məhkəməsinin prokuroru Luis Moreno-Okamponun müraciətinə əsasən verilib.

İnterpolun baş katibi Ronald Noublun sözlərinə görə, "qırmızı orderlərin" verilməsi Liviya hakimiyyətinin hər 3 nümayəndəsinin beynəlxalq sərhədləri keçməsini əsaslı şəkildə çətinləşdirəcək, onların yerinin müəyyənləşdirilməsinə və həbsinə yardım edəcək.

Beynəlxalq Cinayət Məhkəməsinin prokuroru Luis Moreno-Okamponun fikrincə isə, Müəmmər Qəddafinin həbsi an məsələsidir, İnterpolun orderi isə Camahiriyyə liderini əksər ölkələrin hüquq-mühafizə orqanlarının hədəfinə çevirəcək.

Xatırladaq ki, Beynəlxalq Cinayət Məhkəməsi özü Qəddafi, onun oğlu və keçmiş kəşfiyyat rəisinin həbsinə iyunun 26-da order verib. Onların hər üçü Liviyada vətəndaş müharibəsi zamanı bəşəriyyətə qarşı cinayətlərdə ittiham edilirlər.