Azərbaycan Respublikasının Prezidenti İlham Əliyevin göstərişinə əsasən, Türkiyənin Van vilayətinə yola salınmış Fövqəladə Hallar Nazirliyinin 40 avtomobildən ibarət maşın karvanı zəlzələdən zərər çəkmiş bölgəyə çatıb. ANS PRESS-in Fövqəladə Hallar Nazirliyinin rəsmi saytına istinadla verdiyi məlumata görə, hazırda çatdırılmış yardım aidiyyəti üzrə təhvil verilir.

Xatırladaq ki, avtomobil karvanı ilə 1000 ədəd çadır (hər biri 24 kv.m), 40 generator, 40 dəst mətbəx ləvazimatı və 2000-dən artıq ədyal təbii fəlakət bölgəsinə aparılıb.

Bununla da Fövqəladə Hallar Nazirliyi tərəfindən 1250 ədəd çadır, 700 səhra yataq dəsti, 5000-dən artıq ədyal, 2000 yataq dəsti, 40 generator, 40 dəst mətbəx ləvazimatı və 2 səhra mətbəxi təbii fəlakətdən zərərçəkmiş bölgəyə çatdırılıb.