Bakı bulvarında uşaqlar üçün növbəti pulsuz atraksion aksiyası keçiriləcək. Dənizkənarı Bulvar İdarəsinin rəis müavini Nazim Məcidovun verdiyi məlumata görə, aksiya martın 29-da olacaq. Həmin gün uşaqlar saat 09:00-dan 13:00-ə qədər park ərazisindəki atraksionlarda heç bir ödəniş etmədən əylənə biləcəklər.

Nazim Məcidov aksiyanın istirahət və bayram günlərində keçirilməməsinin səbəbinin parkda istirahət edənlərin sayının çoxluğu üzündən sıxlığın yaranması ilə bağlı olduğunu bildirib. Sıxlıq yarananda isə istirahət obyektlərinin əməkdaşları lazımi səviyyədə xidmət göstərə bilmir.

Qeyd edək ki, Bulvar ərazisində pulsuz attraksion aksiyası ötən ildən başlayıb. Aksiya ilk dəfə ötən il iyunun 1-də, Beynəlxalq Uşaq Hüquqlarının müdafiəsi günündə keçirilib. Ənənəvi hal alan aksiya hər ayın müəyyən günündə təşkil edilir.