Martın 9-da Ağdamın Baykal dərəsi adlanan ərazisində tapılan 13 tank əleyhinə mina bu gün Azərbaycan ərazilərinin minalardan təmizlənməsi üzrə Milli Agentliyin (ANAMA) əməkdaşları tərəfindən partladılaraq zərərsizləşdirilib. Minaları ərazidən çıxarmaq təhlükəli olduğundan onlar yerindəcə partladılıb.

ANAMA-dan verilən məlumata görə, həmin ərazidən tank əleyhinə minalardan əlavə 5 ədəd “TM-62” minasının döyüş başlığı da tapılıb.

Qeyd edək ki, ötən il Baykal dərəsi adlanan ərazidə 4 traktor minaya düşüb. Ümumilikdə indiyə qədər Ağdam ərazisində 51 mina aşkar edilərək zərərsizləşdirilib. Ağdam rayonunun 8 milyon kvadratmetr ərazisi mina və partlamamış döyüş sürsatları ilə çirklənmiş hesab olunur. 2006-cı ildən Ağdam ərazisində təmizləmə əməliyyatlarına başlayan mina axataranlar indiyə qədər 4,5 milyon kvadratmetr ərazini partlamamış döyüş sursatlarından təmizləyə biliblər. ANSPRESS