Pakistanın cənub qərbində yerləşən Belucistan vilayətində çərşənbə axşamı baş vermiş güclü zəlzələnin qurbanlarının sayı artıb. ANS PRESS-in "RİA Novosti" agentliyinə istinadla verdiyi məlumata görə, zəlzələ qurbanlarının sayı 515-ə çatıb.
Yüzlərlə insan xəsarət alıb. Tibb işçiləri bildirir ki, bütün zərərçəkmişləri yerləşdirmək üçün xəstəxanalarda yer çatışmır. Ordu zərərçəkmişləri helikopterlərlə başqa bölgələrə daşıyır.

Seysmoloqların məlumatına görə, zəlzələnin episentri Belucistan ərazisində, Avaran şəhərindən 66 km şimal şərqdə olub.

Xatırladaq ki, güclü yeraltı təkanlar çərşənbə axşamı qeydə alınmışdı. 7,8 bal gücündəki ilk zəlzələdən sonra ən güclüsü 5,9 bal olan 15 afterşok baş verib.