Ukraynanın Zaporojye vilayətində yerləşən Zaporojye Avtomobil İstehsalı zavodunun (ZAZ) sexlərinin birində yanğın baş verib. ANS PRESS-in «İnterfaks-Ukrayna» agentliyinə istinadən yaydığı məlumata görə, yanğın müəssisəsinin mexaniki yığma sexində başlayıb və 300 kv.m ərazini əhatə edib. Hadisə yerinə Ukrayna Fövqəladə Hallar Nazirliyinin yanğınsöndürən maşınları cəlb olunub. Ölən və yaralanan yoxdur.

Qeyd edək ki, Zaporojye Avtomobil istehsalı Zavodu hazırda Ukraynanın ən iri avtomobil istehsal edən müəssisələrindən biridir. “ZAZ”, “Lanos”, “Sens”, “VAZ”, “Chevrolet” avtomobillərinin və “TATA” yük maşınları istehsal edir. Bu yaxınlarda isə zavod KİA avtomobillərinin istehsalına başlayıb. Zavodun məhsulları Rusiya, Misir, Belarus, Gürcüstan, Suriya, İndoneziya və Azərbaycana ixrac olunur.