"Türkiyə Avropa İttifaqına daxil olmağa hələ hazır deyil. Türkiyənin Avropa İttifaqına daxil olması məsələsinin artıq gündəlikdə olduğunu düşünənlər yanılırlar". Bu sözləri Ankaraya səfər öncəsi "Bild" qəzetinə müsahibəsində Almaniyanın vitse-kansleri və xarici işlər naziri Qido Vestervelle deyib.

Eyni zamanda Q.Vestervelle Türkiyənin Avropa İttifaqına üzv olmasında perspektiv görür. "Xüsusilə Almaniya Türkiyənin Avropaya inteqrasiyasında böyük iqtisadi marağa malikdir", - deyə o qeyd edib.

Almaniyalı nazirin sözlərinə görə, Avropa xüsusilə Əfqanıstan, İran, Yəmən və Yaxın Şərqdə mövcud olan regional münaqişələrin həllində Türkiyənin “konstruktiv yardım”ına ehtiyacı var.

Vitse-kansler Türkiyənin Avropa İttifaqına daxil olmasına dair qərarın Almaniyada keçiriləcək referenduma daxil edilməsi məsələsinin gərək olub-olmamasına dair sualı açıq qoyub. "Yalnız bir neçə ildən sonra aktual olacaq mövzunu indidən müzakirə etmək lazım deyil", - deyə o bildirib. ANSPRESS