Krımın Feodosiya şəhərində Ukrayna dəniz piyadalarını mühasirəyə almış rus hərbçiləri martın 15-də yaşlı ukraynalı qadınla mübahisədə aciz qalıblar.

ANS PRESS-in məlumatına görə, qadının “Çıxın evinizə gedin!”, “Biz sizdən qorxmuruq!”, “Qorxu qul psixologiyasıdır!” kimi sözlərinə cavab tapa bilməyən rus hərbçiləri qadına qarşı güc tətbiq ediblər. Rus komandirin yumruğuna dözə bilməyən yaşlı qadın yerə sərilib. Ayağa qaxan qadın qürurunu pozmayıb, onu itələmək istəyən başqa rus hərbçisinə deyib: “Rədd ol, əlini mənə toxundurma!”.

Qeyd edək ki, tatarca adı Kefe olan Feodosiya şəhərində artıq iki həftədən çoxdur Ukrayna dəniz piyadaları batalyonu Rusiyadan gəlmiş hərbçilər, kazaklar və “Rus Birliyi” blokunun siyasətçiləri tərəfindən mühasirəyə alınıb.