Türkiyə ordusu İraqın Şimalında PKK silahlılarına qarşı eyni vaxtda quru və hava əməliyyatları keçirib. Bu barədə məlumatı Türkiyənin silahlı qüvvələrinin baş qərargahı yayıb. Türkiyə hərbi qurumunun internet saytında yerləşdirilən məlumata görə, təhlükəsizlik qüvvələrinin bölmələri İraqın şimalına təxminən 2 kilometr daxil olaraq döyüş helikopterlərinin köməkliyi ilə separatçılara qarşı əməliyyat keçirib. Əməlioyyat nəticəsində azı 4 PKK silahlısının qətlə yetirildiyi bildilir.

Bundan başqa Türkiyə hərbi hava donanması 45 dəqiqə ərzində silahlılırın Şimali İraqdakı mövqelərini, onların zenit qurğularının olduğu yerlərə hava zərbələri endirib.

Türkiyə komandanlığının bildirdiyinə görə əməliyyata nəzarət baş qərargahdan həyata keçirilib və bütün hədəflər vurulub.

Qeyd edək ki, PKK ilə münaqişə indiyədək 40 min nəfərin həyatı bahasına başa gəlib. BMT və Avropa Birliyi PKK-nı terrorçu təşkilatlar siyahısına daxil edib. ANSPRESS