Türkiyə "Altay" markalı ilk yerli tanklarını təqdim edib. Türkiyənin baş naziri Rəcəb Tayyib Ərdoğanın iştrakı ilə keçən təqdimata, eyni zamanda, Ali Hərbi Qərargahın rəhbəri ordu generalı Necdet Özəl, Milli Müdafiə naziri İsmət Yılmaz, Elm və Texnalogiya naziri Nihat Ərgün və tankın istehsalçısı olan Koç Holdinqin prezidenti Mustafa Koç da qatılıb. Ərdoğan çıxışı zamanı yeni tankların istehsalını ölkə üçün tarixi hadisə adlandırıb. Belə bir hadisəyə şahidlik etdiyi üçün fəxarət hissi keçirdiyini qeyd edən Ərdoğan tankın ərsəyə gəlməsində iştrak edən hər kəsə təşəkkür edib.

"Türkiyə tank istehsal edən az sayda ölkələrdən biridir. İndiyə kimi müdafiə sənayesinin inkişafı məqsədilə irihəcmli yatırımlar etmişik. Bu gün nəhayət ki, öz silahını, tankını, təyyarəsini istehsal etmək qabiliyyətinə malik olan ölkə səviyyəsinə gəlmişik. Türkiyə pilotsuz təyyarə istehsal edən üçüncü ölkədir. Hərbi sənayedə əldə etdiymiz nailiyyətlərlə son 10 ildə ordumuzun gücünü daha da artırmışıq. Ordusunun ehtiyaclarını özü qarşılaya bilən bir ölkə olmaq üçün əmin addımlarla irəliləməyə davam edəcəyik. Bizim hər hansı bir ölkəyə qarşı düşman mövqeyimiz yoxdur. Özümüz üçün arzu etdiyimizi digər bölgələr üçün də arzu edirik. Lakin bizim xoş niyyətimizi heç bir ölkə passivlik kimi başa düşməsin. Bizim də səbrimizin sərhədləri var. Dünyanın ən güclü ordularına qarşı lazımi müdaxilə etməkdən çəkinmərik. Altayın sülh və stabilliyə xidmət etməsini arzu edirəm", - deyə Ərdoğan sözlərini ifadə edib.

Sonda isə Ərdoğan Altayın qarşısında xatirə fotoşəkli çəkdirib.

Qeyd edək ki, tankın adı Qurtuluş savaşı dönəmində 5-ci süvarinin komandiri milli qəhrəman Fəxrəddin Altayın adından götürülüb. Altayın istehsalı tamamilə Birləşmiş Millətlər və NATO standartlarına uyğun şəkildə aparılıb. Tankın hərəkət sistemi ən son texnologiyalar əsasında hazırlanılıb. Onun əsas üstünlüklərindən biri yüksək dəqiqlik və çevikliyə malik olmasıdır. Altay, həmçinin, hərəkət halında olan hədəfləri yüksək dəqiqliklə vurmaq qabiliyyətinə malikdir.