Türkiyə Hakkari vilayətinin Şemdinli rayonunda 15 PKK terrorçusu keçirilən hərbi əməliyyat nəticəsində məhv edilib. “Cihan” agentliyinin yaydığı məlumata görə, rayonun Dərəcik qəsəbəsinin Rüzgarlı və Bağlar kəndlərinin arasında 2 gündür yolu kəsən terrorçular saxta reydlər keçirərək təxribatla məşğul olurmuş.

Qeyd edək ki, hadisə barədə məlumat əldə edən polis və xüsusi təyinatlı hərbçilər terrorçuları təqib etməyə başlayıb. Daha sonra Şemdinliyə 15 km-lik məsafədəki dağlıq ərazidə hərbçilərlə terrorçular arasında atışma baş verib. Helikopterlərin də dəstək verdiyi əməliyyat nəticəsində 15 PKK terrorçusu zərərsizləşdirilib.

Rayon mərkəzində isə təhlükəsizliyin təmin olunması üçün ictimai binaların qarşısında xüsusi təyinatlı polislər yerləşdirilib.