Türkiyə Böyük Millət Məclisinin komitə sədrlərindən ibarət nümayəndə heyəti Gürcüstana səfərə gəlib. ANS PRESS-in AzərTAc-a istinadən verdiyi xəbərə görə, nümayəndə heyətinin üzvləri Gürcüstan parlamentinin sədri David Bakradze və gürcüstanlı həmkarları ilə görüşüb, parlamentlərarası dostluq qrupu formatında müzakirələr aparıb.

Qonaqlar həmçinin Gürcüstan Daxili İşlər Nazirliyi xidmət agentliklərinin fəaliyyəti ilə tanış olub.

Türkiyənin ali qanunvericilik orqanının üzvlərini Gürcüstan prezidenti Mixail Saakaşvili qəbul edib. Görüşdə Gürcüstan və Türkiyə parlamentləri arasında münasibətlər, Gürcüstanın NATO-ya üzv olması üçün Türkiyənin dəstəyi və s. məsələlərdən söhbət açılıb.
Türkiyəli deputatlar ölkələrinin Gürcüstanın ərazi bütövlüyünü dəstəklədiyini bir daha vurğulayıblar.

Qonaqlar səfər çərçivəsində Kutaisi və Batumi şəhərlərinə də baş çəkəcək. Səfər iyunun 11-də başa çatacaq.