İngiltərənin “Sunday Express” qəzeti eksklüziv xəbərində Suriya döyüş təyyarələrinin Kipr hava məkanına daxil olduğunu yazıb. ANSPRESS-in “Sunday Express”-ə istinadən verdiyi məlumata görə, şübhəli uçuşları izləyən Türkiyə isə İncirlikdən iki F-16 təyyarəsini havaya qaldırıb. Yüksək tirajla çap olunan qəzetin bu gün nəşr olunan buraxılışında “Suriya meydan oxumaq üçün təyyarələrini Kiprə göndərdi” başlıqlı xəbərində İngiltərənin də Kiprə 6 Tiphon döyüş təyyarəsini göndərərək gərginliyi artırdığını bildirilib.

Suriyanın addımını hava məkanının pozulması kimi təqdim edən nəşr İngiltərə Müdafiə Nazirliyinin açıqlamasına da yer verib. Qəzet bildirir ki, nazirlik İngiltərənin Kiprə təyyarə göndərdiyini təsdiq edib. “Sunday Express” həmçinin sentyabrın 2-də 2 şübhəli təyyarənin ingilis və türk radarları tərəfindən təsbit edildiyini də qeyd edib.